நம்பிக்கைச் சாட்சியங்கள்: கருத்துக்களும் அவை கொண்டிருக்க வேண்டிய அம்சங்களும்.

அல்லாஹ்வைத் தவிர வேறு வணக்கத்துக்குரிய (இறைவ)ன் யாரும் இல்லையென்றும் முஹம்மத் (ஸல்) அவர்கள் அவனது தூதர் ஆவார் என்றும் சாட்சி கூறுகின்றேன்.

வணங்கப்படுவதற்குரிய உண்மையான இறைவன் அல்லாஹ் ஒருவனைத் தவிர வேறு எவரும் இல்லையென்பதே இதன் அர்த்தமாகும்.

இவ்வாறு சொல்வதானது, தெய்வீகப் பண்புகளை அல்லாஹ்வைத் தவிர வேறெவருக்கும் வழங்க முடியாது. மேலும், இணையேதும் கற்பிக்காத நிலையில் இவைகளை முழுமையாக அல்லாஹ்விற்கு    மாத்திரமே உறுதியாக வழங்குதல் வேண்டும் என்பதையே உணர்த்துகின்றது.

"இலாஹ்" என்ற அறபுப் பதமானது, வணங்கப்படும் இறைவன்'எனும் பொருளைக் குறிப்பதற்குப் பயண்படுத்தப்படும்.

எனவே, ஒருவன் ஏதாவது ஒன்றை வணங்கினால், அவன் அல்லாஹ்வை விடுத்து அதனையே கடவுளாக எடுத்துக் கொண்டான் என்றே கருதப்படும்.

"அல்லாஹ்" என்ற உண்மையானதோர் இறைவனைத் தவிரவுள்ள அனைத்துக் கடவுள்களும் போலியானவைகளே.

ஆகவே, வணங்குவதற்குத் தகுதியானவன் அவன் மாத்திரமே. மனித உள்ளங்கள் அன்போடும், கௌரவத்தோடும், பணிந்தும், பயந்தும் அவனை மாத்திரமே வணங்குகின்றன.

அவன் மீது நம்பிக்கை கொண்டு அவன் மாத்திரமே உதவிக்கு அழைக்கப்படுவதோடு, காரியங்கள் அனைத்தும் அவனிடமே ஒப்படைக்கப்பட்டு அவனுக்கே தொழுகைகளும் நேர்ச்சைகளும் செய்யப்படுகின்றன.

எனவே, அவனுக்கு மாத்திரமே மனத் தூ ய்மையோடு வணக்கங்கள் செய்யப்படல் வேண்டும்.

இதனையே அல்லாஹ் இவ்வாறு கூறுகின்றான் :

"இன்னும், அல்லாஹ்வை அவனுக்காகவே  வணக்கத்தைக் கலப்பற்றதாக   ஆக்கியவர்களாக, (அனைத்து தீயவழிகளை விட்டும் நீங்கி இஸ்லாத்தின் பால்) சாய்ந்தவர்களாக" (அல் பையினா : 5)

"லாஇலாஹ இல்லல்லாஹ்" என்ற திருக்கலிமாவின் அர்த்தத்தை கவனத்திற்கொண்டவராக, மனத்தூய்மையோடு ஒருவர் அல்லாஹ்வை வணங்கினால் அவர் மணமான, கௌரவமான, சுபீட்சமான, சந்தோஷகரமானதொரு வாழ்வைப் பெற முடியும்.

அல்லாஹ் ஒருவனை மாத்திரம் வணங்குவதன் மூலமே மனித உள்ளங்கள் அமைதியையும், சந்தோஷத்தையும், மன ஆறுதலையும் பெறுகின்றன.

இதனையே அல்லாஹ் இவ்வாறு கூறுகின்றான் :

"ஆண் அல்லது பெண் அவர் விசுவாசங்கொண்டவராக இருக்க, யார் நற்செயலைச் செய்தாரோ நிச்சயமாக நாம் அவரை நல்ல வாழ்க்கையாக வாழச் செய்வோம்." (அந் நஹ்ல் 97)